საიტზე მიმდინარეობს ტექნიკური სამუშაოები

ელჩის ბიოგრაფია

თეა კატუკია - საფრანგეთში საქართველოს ელჩი და იუნესკოში საქართველოს მუდმივი წარმომადგენელი. იგი ოცი წლის განმავლობაში მუშაობდა საფრანგეთში (პარიზში) და იტალიაში (რომი) ევროპულ და საერთაშორისო საკითხებზე, ინსტიტუციური კომუნიკაციის, კვლევისა და სამეცნიერო ჟურნალისტიკის სფეროებში.

ივანე ჯავახიშვილის სახელობის თბილისის სახელმწიფო უნივერსიტეტის დასავლეთ ევროპული ენებისა და ლიტერატურის ფაკულტეტის ფრანგული ენისა და ლიტერატურის განყოფილებაზე ორწლიანი სწავლის შემდეგ, 1995 წელს თეა კატუკიამ სწავლა განაგრძო პარიზში, სორბონის უნივერსიტეტში. თავდაპირველად სწავლობდა ფრანგული ცივილიზაციის კურსებზე, ხოლო 1996 წლიდან დაიწყო სამართლის შესწავლა უნივერსიტეტ პარიზი-II-ში (Panthéon-Assas). 2001 წელს მან წარჩინებით (magna cum laude) დაასრულა სორბონის უნივერსიტეტის პოლიტიკურ მეცნიერებათა და ევროპათმცოდნეობის სამაგისტრო პროგრამა. მისი სადიპლომო ნაშრომები ეძღვნებოდა ევროპარლამენტისა და ევროკავშირის სახელმწიფოების პარლამენტების ურთიერთობის საკითხს და ევროკავშირის ფუნდამენტურ უფლებათა ქარტიას. შემდეგ მან მუშაობა განაგრძო სორბონის უნივერსიტეტის ევროპული საჯარო სამართლის სადოქტორო ნაშრომზე ევროპული კონსტიტუციის შექმნის თემაზე.

უნივერსიტეტში სწავლის პარალელურად თეა კატუკიამ პროფესიული საქმიანობა დაიწყო ევროპულ საკითხებში სპეციალიზირებულ მთავარ ფრანგულ think tank-ებში.

2000 წელს მან მუშაობა დაიწყო საფრანგეთის მთავრობისა და ევროკომისიის მიერ დაფუძნებულ საინფორმაციო ცენტრში ევროპული წყაროები (Sources d’Europe) და საქმიანობდა ევროკავშირის შესახებ ინფორმაციის გავრცელების კუთხით.

2001 წელს იგი ჟან მონეს სახელობის ასოციაციის მისიის ხელმძღვანელი გახდა და ორგანიზებას და მონიტორინგს უწევდა ევროკავშირის მომავალთან დაკავშირებულ მაღალი დონის ფრანგულ-გერმანული შეხვედრებს.

2002 წელს იგი შეუერთდა საფრანგეთის პანევროპულ კავშირს (საერთაშორისო პანევროპული კავშირის ფრანგულ შტოს) და მონაწილობას იღებდა ევროკომისიის ეგიდით ჩატარებულ საინფორმაციო კამპანიაში, რომელიც ეძღვნებოდა ევროპის კავშირის გაფართოებასა და კანდიდატ ქვეყნებს.

2004 წელს იგი დაასახელეს საფრანგეთის პანევროპული კავშირის გენერალურ დელეგატად. იგი ახორციელებდა სტრატეგიისა და განვითარების დაგეგმარებას ევროპარლამენტის საპარლამენტო პანევროპულ სამუშაო ჯგუფთან (ევროპის სახალხო პარტიის ჯგუფი) და საერთაშორისო პანევროპულ კავშირთან (30 ქვეყნის დელეგაცია). იგი კოორდინირებას უწევდა დიდი საერთაშორისო ევროპული კონფერენციების ორგანიზებას, მაგალითად 2004 წლის პარიზის კონფერენციას ევროპის დამოუკიდებლობისა და ტექნოლოგიურ სუვერენიტეტზე (საფრანგეთის რესპუბლიკის პრეზიდენტის პატრონაჟით) ან 2007 წლის რომის კონფერენციას ევროპული კულტურის შესახებ (იტალიის რესპუბლიკის პრეზიდენტის პატრონაჟით). პარალელურად საფრანგეთის ეროვნული ასამბლეის ერთ-ერთ პარლამენტართან თანამშრომლობით მან შეიძინა საკანონმდებლო გამოცდილება.

2011 წელს, თეა კატუკია გამომცემლობის გენერალური მდივნის რანგში შეუერთდა პრესის ჯგუფ Areion Group-ს. 2012 წელს იგი გახდა ჟურნალ დიპლომატიას DIPLOMATIE მთავარი რედაქტორი. ამავდროულად მას მიანდეს ინოვაციის, მდგრადი განვითარებისა და ლურჯი ეკონომიკის თემატიკისადმი მიძღვნილი სარედაქციო გუნდის შექმნა და მმართველობა.

ამავე წელს იგი გახდა საერთაშორისო საფრთხეების პრევენციისა და ანალიზის ცენტრის (CAPRI) გენერალური მდივანი.

თეა კატუკია ფლობს ქართულ, ფრანგულ, იტალიურ, რუსულ და ინგლისურ ენებს.

ჰყავს მეუღლე და ორი შვილი.